LAWAS MUKA BENRANG EMPAT

MUKA BENRANG EMPAT
Oleh : Mufti Jauhari Alhusni

Nempas mo leng manik Nabi…
Tananang koasa Nene..
Yasanempas mo pangita…

Leng sopo petang sia e..
Yaisra’ Nabi ko langit..
Yasangita kemban surga..

Leng dalam kemban surga nan…
Nempasmo pangita Diri…
Lako muka benrang empat…

Sopomo benrang sia e…
Barereng ai malino..
Mamung rasa no baroba…

Sopomo benrang kabali…
Barereng jadi no putes…
Mampis no roa baroba…

Benrang ketelu siae….
Barereng ai panginum…
Sai tu rasa no baning…..

Adamo benrang kasuda….
Barereng aning katapis….
Sanempas ling manik Nene….

Ala e sai no nyadu…..
Sila ete kitab Qur’an…..
Nempas leng Surat Muhammad….

Bacamo surat Muhammad….
Tananang benrang empat nan…
Kena ayat lima olas…..

Bakatoan nabi Muhammad…
ko diri Malekat Jibril…Me tokal….
Muka ke boa benrang ta…..

Nyamungmo Malekat Jibril….
Muka pang kola Kautsar….
Me tokal tumpu rua na……

Katoan kadu ko Nene……
Sinta ya ada panunas…..
Me tokal tumpu benrang nan….

Ayap doa diri Nabi….
Datang maleket ke salam…..
Ramada ko repan Muhammad….

Beling malekat ko Nabi….
Sapendam mata kadu na..
Pendam mo diri Muhammad…

Benru uleng lungkap mata….
Sipak rapat puen kayu…..
Gita kuba mutiara…….

Kuba mutiara puti….
Lawang kales emas mira….
Senri rupa mata nulang……

Ajan ling sarea ulen….
Manang leng bao kuba nan…..
Manra pio bao olat……

Pinan panulang kabali…..
Lako anok kuba rea….
Aler mo leng empat benrang….

Dapat mo sate ramalik…..
Beling mo malekat Jibril……
Kuda rua no mu tama……

Nyamung mo Nabi Muhammad……
Me luk rua ya ku tama….
Gita kuba rentap lawang……

Lawang kuba kakalatu….
Me tanang bau ku tama…..
Nonda luk ku uleng lawang…..

Nyamung mo malekat Jibril…..
Luk riri kunci lawang nan…..
Dalam regam Repan Nabi….

Satrentris ampo ling Jibril…
Yabada kunci lawang nan….
Pameli lafaz Bismillah….

Rapat diri Repan Nabi..
Sanepat lako kuba nan….
Sate mo ya uleng lawang…..

Benru baca mo Bismillah….
Satenris Rahman ke Rahim….
Lawang ka rentap nganga mo…..

Benru ya sonap mo kuba….
Nempas rupa benrang empat….
Aler kales empat tiang…..

Waya mo sate ramalik….
Kakales dalam kuba nan…..
Konang Jibril bakatoan…..

Pakatoan diri jibril…..
Ko Repan Nabi Muhammad….
Adake nempas panulang…..

Nyamung Diri Repan Nabi….
Nempas boe mo ku gita…..
Saksi ke mata ke ate….

Beling Jibril lako Nabi..
Balik mo kareng sakali….
Balong mu tulang kadu na…..

Benru nulang diri Nabi….
Nempas mo rupa leng mata…
Tiang satera bismillah…

Benrang kales ai lino…
Ramuka pang satera Ba..
Kakales lafaz Bismillah …

Benrang ka aler ke jadi…
Ramuka ling satera ha…
Kakales lafaz jalala….

Benrang panginum no manir….
Ramuka pang satera mim…
Kakales lafaz Arrahman….

Benrang ka aning katapis….
Ramuka pang satera mim…
Kakales lafaz Arrahim….

Beling mo Nabi Muhammad….
Kantapmo pamaham ate….
Benrang ka pasal Bismillah….

Ramanikmo Allah Ta’ala….
Ko diri Nabi Muhammad….
Kabalong kapang Bismillah…..

Sai tu totang ko Nene….
Ke sarea singing Diri….
Santuret kewa Bismillah…..

Bismillah ayap ke ihlas…
Satenris tutu ke ate…
Benrang empat ya pamalas….

Panginum ling benrang empat…
Tawa tu notang no putes…
Imung ke rea pahala….

Leng dalam Syair budiman…
Yajijir kewa yatuter…
Tananang kalam Bismillah…

Sarampak kewa no putes…
Genras panotang ko Nene…
Samengas kewa katenrang…

Singin Nene’ Asma Allah…
Sajagat angis kabalong…
Kales genra nanda baning..

Nosoda tanang ya kawan..
Sapatan pang sifat Nene…
Ya aran jijir sarea..

Nosoda dowe pangeto ….
Me tanang ke tananang…
Hakekat tu Puji Repan…..

Ya Allah Nene’ Koasa…
Ku tunas bantal era na…
Ke kedewa Asma Repan….

Kadewa Asama’ul Husna…
Sangayap kewa pamaham…..
Nan nya medo de satutu….

Ya Allah Nene’ Koasa…
Ke Asma ku arap kareda…
Ampin mo ulin doraka….

Doraka ulen ko Nene….
Santuret rua leng ate…
Yakuri bae ko nafsu…

Ada gama yapanunas…
Dadi panempa parana….
Ulen tu turret sayri’at…..

Satunas gama pangeneng….
Sangedo ke datu bid’ah….
Saparak ke Husnul Yaqin….

Nikmat rasa Husnul Yaqin….
Kaling kesenar ngalimak…..
Penghulu pamili Nene’….

Lawas Loka

PITU MO BENRANG KU LEMPAT
KUBUYA MUKA BENRANG EMPAT
NOSODA NYONDE BADA AKU

ADA SI NYONDE BADA AKU
BASINGIN MUKA BENRANG EMPAT
NYATAMO DALAM BISMILLAH
Hatifa Hasan Samburag (alm), Jurumapin

Dari referensi yang penulis baca (Buku Penawar Kegundahan hati), diperoleh kesimpulan bahwa palaku yang digambarakan pada syair lama di atas adalah baginda Nabi Muhamad, dan kata NYONDE pada bait kedua ialah beliau Malaikat Jibril.

Refrensi/Translate dari Bab pada buku : At-Tuhfan Al-Mardhiyah Fil Akhabaril
Qudsiyyah Wal-Ahaditsin Nabawiyyah (Penawar Kegundahan Hati)
Oleh : Syiakh Abdul majid Ali Al-Adawiyah ( Mesir : Musthafa A-Bbabi Al-
Halabi, 1950M/1369 H)